Азийн Хөгжлийн Банк болон Монгол Улсын Засгийн газар, иргэдэд түшиглэсэн гамшгийн эрсдэлийн удирдлагыг шинээр нэвтрүүлэн, турших 3 сая ам.долларын буцалтгүй тусламжийн төсөлд өнгөрсөн баасан гариг буюу энэ сарын 28-нд гарын үсэг зурсан юм. Төслийн хүрээнд Дорнод, Говь-Алтай, Хөвсгөл болон Сүхбаатар аймгуудын малчид зуд, ой хээрийн түймэр болон байгалийн бусад гамшгийг даван туулах чадавхийг сайжруулахаар төлөвлөжээ.

        Төслийг өнгөрсөн 16 жилийн хугацаанд Монголын ядуурлыг бууруулах, олон нийтийн үйл ажиллагааг, иргэдийн амьжиргааг сайжруулах болон байгаль орчны чиглэлээр тусламж үзүүлж ирсэн “Ядуурлыг бууруулах Японы сан”-аас санхүүжүүлсэн байна.

        Уг төслийн баримт бичигт Монгол Улсын Засгийн газрыг төлөөлөн Сангийн дэд сайд Х.Булгантуяа, АХБ-ийг төлөөлөн Суурин төлөөлөгч Ёланда Фернандез Ломмэн нар гарын үсэг зурсан юм. Мөн Япон Улсын Элчин сайдын яамыг төлөөлөн Элчин сайдын яамны Нэгдүгээр нарийн бичгийн дарга Хироши Фукасава, төслийг хэрэгжүүлэгч байгууллага болох Онцгой байдлыг ерөнхий газрын дарга, Бригадын генерал Бадрал тус тус оролцжээ.

        “Энэхүү төсөл нь Монгол улсад гамшгийн эрсдэлийн удирдлагад иргэдийн оролцоотой “дороос дээш чиглэсэн тогтолцоо”-г анхлан туршиж, нэвтрүүлэх зорилготой юм байна. Энэ тухай  хатагтай Фернандез Ломмэн “Ингэснээр Монгол орны хамгийн эмзэг газар нутаг, ядуу малчдын болон орон нутгийн гамшигтай тэмцэх байгууллагуудын зуд, ой хээрийн түймрээс үүдэх эрсдэлийг удирдах чадавхийг дээшлүүлэх юм” хэмээсэн юм. Уг төсөл нь ядуурлыг бууруулах, иргэдийн амьжиргааг дэмжих, байгаль орчныг хамгаалах үйл ажиллагааг зорилтот бүс нутаг, салбар болон үр шим хүртэгчдэд хүрэх гэсэн Засгийн газар болон АХБ-ны зорилго, үйл ажиллагааны тусгал болж байгааг үйл ажиллагаанд хүрэлцэн ирсэн хүмүүс хэлж байлаа.

        Монгол орны эрс тэс уур амьсгал, малчин өрхүүд нүүдлийн мал аж ахуй эрхэлдэг зэрэг хүчин зүйлс нь малчдын амьжиргаа алдагдах, хүрээлэн буй орчин, экосистем доройтох эрсдэлийг улам бүр нэмэгдүүлж байна. Зуд, ой хээрийн түймэр нь Монгол оронд тохиолддог хамгийн их хохирол учруулдаг байгалийн гамшиг түзэгдлүүд юм. Сүүлийн 10 жилд давтамж нь улам ихсэж байгаа ган зудын аюул хөдөөгийн хүн амын үлэмж хэсэгт сөргөөр нөлөөлж, хохирол учруулж байна. Тухайлбал, 2009-2010 онд тохиолдсон зудын үед Монгол Улсын нийт малын тоо толгойн 25 хувь хорогдсоны уршгаар 97,000 малчин өрхийн амьжиргаа шууд байдлаар хүндэрсэн байдаг. Нэгдсэн Үндэстний Байгууллагын тооцоолсноор ,Монгол Улсын малчин иргэдийн 41 гаруй хувь 2015-2016 оны зудын нөлөөлөлд өртөж, 1.1 сая тоо толгой мал хорогджээ.

        Тиймээс уг төсөл нь Засгийн газрын гамшгийн эрсдэлийг бууруулах, олон нийтийн оролцоог нэмэгдүүлэх болон гамшгийн хор уршгийг арилгах зэрэг зорилтод чиглэсэн, илүү цогц арга барилаар хэрэгжүүлэх хэрэгцээ шаардлагатай уялдаж байгаа юм байна.

        Төслийн шууд үр шимийг сумын төвд оршин суудаг 2,500, тэрдундаа 250 өрх толгойлсон эмэгтэй бүхий айл өрхийн нийт 7,000 малчин хүртэх бол шууд бус байдлаар олон нийтийг илүү өргөн хүрээгээр хамарч, төсөл хэрэгжих зорилтот сумдын нийт 32,000 хүн ам хүртэнэ гэсэн тооцоо гарчээ. Үүнээс гадна энэхүү төслийн үр ашиг нь удаан хугацаанд тогтвортой байж, төслийн үйл ажиллагааг өөр бусад нутагт улам өргөжүүлэн хэрэгжүүлэх боломжтой байх зорилготой ажээ.

        Ядуурлыг бууруулах Японы сан нь 2000 оны 5 дугаар сард байгуулагдсан ба АХБ-ны хөгжиж буй гишүүн орнуудын нийгэм, эдийн засгийн урт хугацааны хөгжлийг дэмжих, нийгмийн хамгийн ядуу, эмзэг хэсэгт чиглэсэн төслүүдэд буцэлтгүй тусламж олгодог байна. Манай улс үүний тоонд ордог юм.

        АХБ-аас Монгол Улсад олгохоор баталсан санхүүжилтийн нийт хэмжээ 2015 онд 297.5 сая ам.долларт хүрчээ. Үүнд 275 сая ам.доллар бүхий Засгийн газрын 4 зээл, 6 сая ам.доллар бүхий төслийн 2 буцалтгүй тусламж, 16.5 сая ам.долларын дүн бүхий техник туслалцааны 17 буцалтгүй тусламж зэрэг багтжээ.

Эх сурвалж: Breakingnews.mn