...
...
  1. Нүүр
  2. Улс төр

Н.Наранбаатар: Одоо үнэн бодит мэдээллээ өгөөд хариу арга хэмжээгээ сайн авах цаг нь болсон

 701    2021-6-14

Эрүүл мэндийн яамны өнөөдрийн 11:00 цагийн мэдээллээр Өмнөговь аймгийг НОГООН БҮС хэвээрээ байгаа гэж мэдэгдсэн. Тэгвэл энэ нь бодит байдалтай нийцэхгүй болохыг тус аймгаас УИХ-д сонгогдсон Н.Наранбаатар гишүүн хэлж байна.

Тэрбээр “Одоо үнэн бодит мэдээллээ өгөөд хариу арга хэмжээгээ сайн авах цаг нь болсон. Өмнөговь аймагт халдвар өдөр бүр нэмэгдсээр байна. Хаана ямар голомт үүссэнийг хүмүүс мэдэхгүй байна. Нүүрс тээврийн жолооч нараас гурван өдөр дараалан эерэг тохиолдол илэрч  “Ганц мод” боомт нүүрс татан авалтаа зогсоосон. Тэд мэдэхийн дээдээр мэдэж байгаа. Цагаан хадны суурьшлын бүсээ ногоон болгох ажлаа харин сайн хийж экспортоо яаралтай сэргээмээр байна. Энэ саналаа УОК-д мэдэгдсэн” гэлээ.

Тодотгоход, манайхаас “Ганц мод” боомт руу нэвтэрсэн нүүрс тээврийн жолоочоос ковидын халдвар илэрсэнтэй холбоотойгоор өнгөрсөн баасан гарагаас Гашуунсухайт боомт сул зогсоод байна.

Энэ оны нэгдүгээр сарын 1-нээс зургаадугаар сарын 3-ны өдрийг хүртэлх  нүүрсний экспортын үзүүлэлтийг харвал, 8,945.2 мянган тонн нүүрс гаргаад байна. Энэ нь өмнөх оны мөн үетэй харьцуулахад,  2,448.7 мянган тонн буюу 37.7 хувиар өссөн үзүүлэлт юм.

Гэхдээ нүүрс тээврийн жолооч нараас ковид илэрч буй нь ийнхүү гол боомтуудын үйл ажиллагааг зогсоосноор экспорт уруудахад нөлөөлөхөөр байна. Мөн БНХАУ-ын коксжих нүүрсний эрэлт энэ оны хоёрдугаар хагаст  буурах төлөв ажиглагдаж буй. Тэгэхээр дотоод, гадаад аль аль эрсдэлийн улмаас төсвийн орлогод чухал нөлөөтэй  нүүрс, зэсийн экспорт дахин уруудах төлөвтэй байна.

Сануулахад, өнгөрсөн гуравдугаар сарын дундуур “Оюутолгой”-д коронавирусний хоёр  сэжигтэй тохиолдол илэрснээс болоод Гашуунсухайтын боомтоор гардаг зэсийн баяжмалын экспорт зогсож, нүүрсний тээвэр  өдөртөө 20-30 машин л гарч байсан. Мөн  “Саус Гоби Сэндс” компанид  сэжигтэй тохиолдол илэрсэнтэй холбоотойгоор Шивээхүрэн боомтын үйл ажиллагаа ч хэд хоног хаагдаж байсан. Тэгэхээр одоо жолооч нараас халдвар илрэх нь нэмэгдээд байвал өмнөх шиг нөхцөл байдал давтагдаж, БНХАУ-ын тал манайхаас татан авалт хийхээ харзнахаар байна.

 701    2021-6-14
Энэхүү мэдээ нь зохиогчийн эрх зөрчсөн, зохисгүй агуулга оруулсан, бусдын эрх ашигт халдсан байвал дараах утсаар мэдэгдэнэ үү: 99503250
Сэтгэгдэл илгээхийн тулд хариуг оруулна уу
Сэтгэгдэл (0)

Онцлох мэдээ

Зохиогчийн эрх хуулиар хамгаалагдсан болно.

BreakingNews.mn сайтын уран бүтээлчид, сэтгүүлчдийн мэдээллийг
редакцийн зөвшөөрөлгүй хуулбарлах, цацах, ямар нэгэн хэлбэрээр ашиглахыг хориглоно.